كان العشم عندي أكوام .. وما بقي إلا لمم
ناس عديتهم لي حزام .. طلعوا كومة رمم
والظاهر إني طولت في الأوهام .. وما صحيت إلا على نص الفلم
إلي سوى انه الذيب السمام .. آخر الفلم راح مرعى غنم
والشنب إلي مسوي فيها ضرغام .. طلع راسم الشنب بقلم
يلا .. العشم بالله قدام جور الأيام .. ولا أكثر الناس وجودهم والعدم
كذا انتهت الحكاية ..
بنهاية ما لها أي معنى
مجرد ناس .. جرحوا مشاعر ناس
وناس صاحو .. ليش يا ناس
وناس ماهم ناس .. لا والله ماهم ناس
وناس .. ذنبهم إنهم عيال ناس
وهذي كل الحكاية
**
فـــ عيش .. يا عمي عيش
لا تسأل كيف وليش
كل ما في الموضوع إنك لقمة عيش
والجوع مخليهم في حالة طيش
لا تنتظر آسف .. أو تعتقد إنهم راح ينهشوك بس
بشويش
**
عيش .. أقولك عيش
الكلاب بعد ما تنهش .. ما راح تجيك وتقول :
والله معليش !
معليش .. الموضوع واضح مافيه أي تشويش
كلاب .. وهذا دورهم
دورهم ينهشوا لحمك
ودورك تداوي جرحك
وكل ما هدو فيك .. ترجع تبني نفسك
**
في الأخير ..
الحكاية كلها عنك
مالهم فيها غير يلهثوا ورا ظلك
فخليك دايم على رجلك
وقد ما تقدر مد في ظلك
ومهما يزيدوا .. لا يهمك
تراهم عايشين على حسك
يقول عبادي
:
كل ما نرسى
في مينا .. نقول مينا ثاني
وأقول :
ليش تدور مينا ثاني ؟!
وإنت بعدك
ما وصلت الأول .. ولا راح توصل
مافي مينا
..
يا عبادي ..
مافي مينا
هذا بحر
ممدود .. والموج شايش
يخنق العاقل
ويطبطب على الطايش
يبلع الطيب
وتارك الملعون مبسوط وعايش
**
مينا !
جاي تدور
على مينا ؟!
إلا البلا
فينا
يا عبادي والله
البلا فينا
ما تعلمنا
العوم بين الحشايش
ولا عاد
يمدينا .. فرصة وراحت علينا
أول ما
نزلنا الغوص .. إحنا اللي ربّطنا يدينا
ولا عيال
اللذين .. رموا كل القيود .. ولابسين الغوايش
**
هذا البحر
مو لينا .. والله العظيم ماهو لينا
لا تدور على
مرسى ولا مينا .. مافي هنا غير الجحور والخشايش
نصي هنا .. وهناك نصي الثاني
بعضي ماهو مع بعضي !
يمكن أكون تايه ؟! .. يمكن
يمكن ماني لاقيني ؟! .. يمكن
بس الأكيد .. عجزت أفهم زماني
**
قطعت مسافات ومسافات .. لقيتني
مكاني
وقفت .. ما لقيت مكاني !
**
سولفت مع الناس من قلب .. قاموا
وخلوني
بديت ألف وأدور .. رجعوا وسمعوني
**
قضيت عمري ماشي في حالي .. بس الحال
ما كان يمشي
أول ما لفيت .. مشيت أحوالي !!
**
سنين وأنا مصفي نيتي .. وسنين
والغبار مالي أجوائي
غبرتها .. سار الجو صافي
**
مدري اقول يا رب .. أرحمني
ولا ربي كذا راحمني
يقول عبادي
:
دقايق .. لو سمح وقتك .. دقايق
انا مشتاقلك بالحيل وضايق
وأقول
:
وقتي ما يسمح
وقتي ما يسمح أشوفك لو ثواني
الثواني كثير عليك .. جاي تطلبني
دقايق !!
يا دمك
..
نسيت إيش سويت فيا ؟!
يوم كان الوقت وقتك .. ولعت في
قلبي حرايق
حرايق رمدت أحلامي .. كيف
بتحييها يابو دقايق ؟!
تحسب إني نسيت .. طعنتك ليا ؟!
ليالي وأنا اتلوى .. وإنت مبسوط
ورايق
ولا نسيت كيف غدرت بيا !
ولا حسبت حساب رب الخلايق
واليوم تجيني مخنوق وضايق !!
أقول يلا بس .. حل وفارق
